Contratación pública

Un concello sacou a concurso a concesión do servizo de auga potable . Nos pregos fixábanse critérios para valorar as ofertas e tamén como actuar se algunha oferta parecía "temeraria" ou anormal (por ser demasiado baixa ou pouco creíble). A mesa de contratación valorou as propostas, pero decidiu excluir a un dos licitadores por considerar que a súa oferta era anormal . Ao excluílo, o contrato foi adxudicado a outro.

O licitador expulsado acudiu aos tribunais . Sostía que a exclusión estaba baseada en informes técnicos arbitrarios e discriminatorios e que, se se mantivesen as puntuacións que xa se puxeran na fase de valoración, a súa oferta sería a mellor economicamente.

O xulgado de primeira instancia deulle a razón en parte xa que anulou a exclusión e a adxudicación posterior, ordenou "volver atrás" (retrotraer) o procedemento ao momento anterior á exclusión e, ademais, recoñeceu como " situación xurídica individualizada “ o seu dereito a ser adxudicataria por ter maior puntuación. O Tribunal Superior de Xustiza confirmou esa solución, defendendo que o xuíz só se limitara a comprobar unhas puntuacións xa fixadas.

O asunto chegou ao Tribunal Supremo (TS) que corrixe esa forma de resolver. Aínda que un xuíz poida anular unha exclusión e ordenar a retroacción, non pode, na práctica, “adxudicar” o contrato desde a sentenza . Por que? Porque iso impide que a Administración exerza facultades que a lei reserva ao órgano de contratación :

1) requerir e comprobar a documentación previa á adxudicación, co posible efecto de que, se non se atende o requerimento, se entenda retirada a oferta; e

2) decidir antes de adxudicar se renuncia ou desiste do procedemento.

Ademais, o TS di que a sentenza infringiu a regra de que os xuíces non poden fixar o contido discrecional do acto anulado.

O TS, polo tanto, estima o recurso, anula as sentenzas no que "adxudicaban" e ordena retrotraer o procedemento para que o órgano de contratación decida con todas as súas opcións legais abertas.

Os nosos profesionais poden asesorarlle e afrontar todas as cuestións relacionadas coa contratación coa Administración.