Consulta administrativa

Unha empresa quería montar unha instalación para fornecer combustible nunha estrada estatal. Antes de iniciar o procedemento formal para solicitar a autorización, decidiu facer algo previo e opcional, unha consulta previa de viabilidade . A idea desta consulta é bastante práctica, que a Administración che diga se, en principio, o proxecto "ten pinta" de poder autorizarse e que requisitos habería que cumprir, para non gastar tempo e diñeiro en trámites que acabarían en nada.

A Dirección Xeral de Estradas respondeu cun informe desfavorábel . A empresa presentou alegacións , pero a Administración mantivo o "non". Entón, a empresa acudiu aos tribunais cun recurso contencioso-administrativo. Con todo, o TSJ de Madrid inadmitiuno dicíndolle que esa resposta á consulta non era un acto recorrible , como se fose só unha orientación sen efectos reais.

O asunto chegou ao Tribunal Supremo (TS) porque a cuestión importante era saber se se pode recorrer de forma independente ese resposta anterior, aínda que sexa anterior á solicitude formal de autorización. A clave non estaba tanto en que a consulta sexa voluntaria ou estea "fóra" do procedemento ordinario, senón en algo decisivo como o seu carácter vinculante (previsto expresamente no RD 1812/1994 art. 70.9). É dicir, a resposta é dada polo mesmo órgano que logo terá que resolver a autorización e, se o proxecto posterior mantén as mesmas características técnicas, esa resposta obriga á Administración.

Por iso, se a resposta é negativa , o interesado xa sabe de antemán que, neses termos, a autorización rematará denegándose . O TS conclúe que non é unha simple información “sen consecuencias” xa que, aínda que non peche formalmente o procedemento nin impida pedir a autorización, condiciona directamente a decisión futura . En consecuencia, entra no tipo de actuacións que se poden controlar ante a xurisdición contencioso-administrativa.

O TS establece como criterio que a resposta vinculante a unha consulta previa de viabilidade é impugnable de maneira autónoma.

Se vostede se sente perxudicado e descontento cunha actuación administrativa, os nosos profesionais poderán asesorarlle na defensa dos seus dereitos